«Ливерпуль» клубининг уругвайлик собиқ ҳужумчиси, ортда қолган мавсумни Саудия Арабистонининг «Ал-Ҳилол» жамоасида ўтказган Дарвин Нуньес туманли Альбионга қайтиши мумкин. Бу ҳақда «Mundo Deportivo» журналистлари хабар бермоқда.
Манбанинг берган маълумотларига кўра, «Челси» ушбу ҳужумчининг хизматларига қизиқиш билдирмоқда. «Аристократлар»нинг янги бош мураббийи Хаби Алонсо Жоао Педро билан рақобатлаша оладиган ҳужумчи сифатида Нуньесни ўз жамоасида кўришни истамоқда.
Дарвиннинг «Ал-Ҳилол» клуби билан тузган амалдаги меҳнат шартномаси 2028 йилнинг ўрталарига қадар мўлжалланган. Якунига етган мавсумда ҳужумчи Саудия жамоаси сафида 24 та учрашувда майдонга тушиб, ўз ҳисобига 9 та гол ва 5 та голли узатмани ёздириб қўйган.
