7 июнь куни маълум бўлишича, Бразилия терма жамоасининг жароҳат олган ҳимоячиси Уэсли ўрнига таркибга ярим ҳимоячи Эдерсон чақирилди. Ушбу футболчи «Аталанта» клуби шарафини ҳимоя қилади.
Эдерсон Жаҳон чемпионатига борадиган 55 нафар номзоднинг кенгайтирилган рўйхатидан жой олганини билса-да, якуний қайдномага киришига деярли ишонмаётган эди. Шу сабабли футболчи таътилни ўз ватанида ўтказаётган, унинг хорижга чиқиш паспорти эса бошқа шаҳарда эди. Сўнгги шанба куни оқшомда Эдерсон дўстининг тўйида меҳмон бўлди, якшанба куни эрталаб эса Федерациядан қўнғироқ қилиб, терма жамоага чақирилгани ҳақидаги хабарни етказишди.
Натижада, Эдерсоннинг дўстлари унинг паспортини футболчи АҚШга учиб кетиши керак бўлган Сан-Паулу шаҳрига етказиб беришди. Шу билан бир вақтда, футболчининг рафиқаси сафар учун чамадон ва кийим-кечак қидириш билан банд бўлди.
Бразилияликларнинг Жаҳон чемпионатидаги дебют учрашуви кейинги шанба куни бўлиб ўтади. Унда Марокаш терма жамоаси рақиблик қилади. Шунингдек, Карло Анчелотти бошчилигидаги жамоа гуруҳ босқичида Шотландия ва Гаити билан ҳам куч синашади.
