УЕФАнинг собиқ раҳбари Мишель Платини Париж судига ФИФАнинг бир қатор собиқ мулозимлари, жумладан, ташкилотнинг амалдаги президенти Жанни Инфантинога қарши жиноий ва фуқаролик даъво аризаларини юборди. Бу ҳақда Reuters нашри хабар бермоқда.
Манбанинг хабарига кўра, 2015 йилда Платинига қарши қўйилган коррупция айбловлари судга мурожаат қилиш учун асос бўлган. Даъвогарнинг таъкидлашича, ўша пайтдаги воқеалар унга 2016 йилда ФИФА раҳбарлигига ўз номзодини қўйишга тўсқинлик қилган.
Қайд этилишича, Францияда ФИФАнинг собиқ юридик директори Марко Виллигер ва аудит қўмитасининг собиқ раиси Доменико Скалага нисбатан жиноий тергов бошланган. Уларга «ғаразли таъқиб қилиш ва мансаб ваколатларини суиистеъмол қилиш» айбловлари қўйилган. Фуқаролик иши доирасида эса Платини ФИФАдан етказилган зарарни тўлиқ қоплашни талаб қилмоқда ва ташкилот ичида унинг олий лавозимга сайланишини тўсиб қўйиш учун ҳаракатлар бўлганини даъво қилмоқда.
Эслатиб ўтамиз, 2015 йилда Швейцария федерал адлия бюроси ФИФА собиқ президенти Йозеф Блаттерга нисбатан тергов бошлаган эди. У Блаттер томонидан Платинига 1998 йилдан 2002 йилгача кўрсатилган маслаҳат хизматлари учун 2 миллион швейцария франки (тахминан 2 миллион евро) миқдорида ноқонуний пул ўтказиб берилганликда гумон қилинганди. 2025 йилнинг март ойида Швейцария жиноий судининг апелляция палатаси ушбу иш бўйича оқлов ҳукмини чиқарди.
2015 йилнинг декабрь ойида ФИФА одоб-ахлоқ қўмитасининг ҳакамлик палатаси Блаттер ва Платинини 8 йилга футболдан четлаштирган эди. Кейинчалик Блаттернинг дисквалификация муддати 6 йилга, Платининики эса 4 йилга қисқартирилган.
