Килиан Мбаппе Франция миллий терма жамоаси сафида кетма-кет учинчи ўйинда майдонни голсиз тарк этди. Шимолий Ирландияга қарши кечган ўртоқлик учрашуви «учранглилар»нинг 3:1 ҳисобидаги ғалабаси билан якунланди ва бу баҳсда Майкл Олисе хет-трик қайд этди.
Жамоа бош мураббийи Дидье Дешам ўз етакчисининг спорт формаси ҳақидаги саволларга хотиржам жавоб берди ва хавотирга ҳеч қандай сабаб йўқлигини таъкидлади.
«Мен хавотир олмоқчи эмасман. Тўғри, унда бир нечта вазиятлар бўлди, бироқ уларга аниқлик етишмади. Килианнинг ўзи менга голларини АҚШдаги турнир (Жаҳон чемпионати) учун асраб қўяётганини айтди, шундай экан, бу мени тўлиқ қониқтиради», — дея Дешамнинг сўзларини келтирмоқда TF1 телеканали.
Мбаппе Франция терма жамоаси сафида ўтказган 98 та учрашувида 56 та гол уришга муваффақ бўлган. Бўлажак мундиалда унинг жамоаси Сенегал, Ироқ ва Норвегия терма жамоалари билан бир гуруҳдан жой олган.
