Қатар терма жамоаси бош мураббийи Хулен Лопетеги унинг жамоаси 2026 йилги Жаҳон чемпионатида шунчаки қатнашиш учун эмас, балки натижа учун курашиш ниятида эканлигини маълум қилди.

«Жаҳон чемпионатига йўлланма олганингда: "Бу ҳақиқий муваффақият!" дейишинг мумкин. Ва бу ҳақиқатан ҳам катта ҳарфлар билан ёзиладиган муваффақиятдир. Аммо фақат шунга ёпишиб олиб, иш бажарилди деб ўйлаш ярамайди. Йўқ, бу хато. Энди биз қуролларимизни чархлаб, жанг қилишимиз керак», — дея таъкидлади мураббий The Guardian нашрига берган интервьюсида.

«Қуръа пайтида Қатар рақиб бўлиб тушса, бошқа жамоалар бундан хурсанд бўлишини тушуниб турибмиз. Бу бизнинг ғазабимизни келтирмаслиги керак. Биз буни англаб етишимиз лозим. Бироқ улар ҳали бизни мағлуб этишлари керак бўлади», — деди Лопетеги.

«Қатар Жаҳон чемпионатига чиққанлик фактининг ўзини аллақачон нишонлаб бўлди ва бу ҳақиқатан ҳам ноёб ютуқ. Аммо у ерга шунчаки иштирок этиш учун бориш — аҳмоқлик. Биз Жаҳон чемпионатига курашиш учун боряпмиз», — дея фикрини якунлади Қатар термаси устози.

Эслатиб ўтамиз, Қатар терма жамоаси «Б» гуруҳида Канада, Швейцария ҳамда Босния ва Герцеговина терма жамоалари билан бирга кураш олиб боради.