«Ньюкасл»нинг италиялик ярим ҳимоячиси Сандро Тонали фаолиятини янада юқори даражада давом эттириши мумкин. Машҳур инсайдер Николо Скиранинг хабар беришича, 26 ёшли таянч ярим ҳимоячисига «Манчестер Сити» ва «Арсенал» клублари жиддий қизиқиш билдирмоқда.

Манбага кўра, «қарғалар» ўз етакчиси учун 100 миллион евро талаб қилмоқда. Ўтган мавсумда Тонали барча мусобақаларда 53 та учрашувда майдонга тушиб, 3 та гол урди ва 7 та голли узатмага муаллифлик қилди.

Сандро Тоналининг «Ньюкасл» билан амалдаги шартномаси 2028 йилнинг ўрталарига қадар мўлжалланган. Transfermarkt мутахассислари футболчининг бозор қийматини 80 миллион еврога баҳолашмоқда.