Мадриднинг «Реал» клуби марказий ҳимоячиси Рауль Асенсио Бернарду Силванинг трансфери ҳақида ўз фикрларини ўртоқлашди.

Португалиялик ярим ҳимоячи янги мавсум бошидан бошлаб «қаймоқранглилар» сафига бориб қўшилади — у Мадрид клубига эркин агент мақомида ўтмоқда.

«Бернарду Силва — жуда ажойиб футболчи. Шубҳасиз, унинг келиши билан жамоамиз янада кучлироқ бўлади. Биз барча янги футболчиларни қучоқ очиб кутиб оламиз. «Реал»нинг янги лойиҳаси ҳақиқатан ҳам ақл бовар қилмайдиган даражада бўлишига ишончимиз комил», — деди Рауль Асенсио ElDesmarque нашрига берган интервьюсида.

Испанияга кўчиб ўтишдан олдин Силва тўққиз йил давомида «Манчестер Сити» шарафини ҳимоя қилди. Август ойида «шаҳарликлар»нинг собиқ сардори 32 ёшни қарши олади.