Испаниянинг "Жирона" клуби ва Украина терма жамоаси ярим ҳимоячиси Виктор Циганков фаолиятини Туркия чемпионатида давом эттириши мумкин. "Трабзонспор" президенти Эртугрул Доган ярим ҳимоячига бўлаётган қизиқиш ҳақида гапириб ўтди.
Alanya Postasi нашри тарқатган хабарга кўра, Туркия клуби мураббийлар штаби украиналик футболчининг хизматларига жиддий қизиқиш билдирмоқда. Томонлар ушбу ёзда амалга ошиши мумкин бўлган трансфер бўйича музокаралар олиб боришмоқда.
"Агар ушбу трансфер амалга ошмай қолса, унда "Б режаси"ни ишга соламиз", — деди клуб президенти.
Циганков 2023 йилнинг январь ойидан буён "Жирона" шарафини ҳимоя қилиб келмоқда. Томонлар ўртасидаги амалдаги шартнома 2027 йилнинг июнь ойи якунига қадар мўлжалланган бўлиб, унинг трансфер бозоридаги нархи 15 миллион еврони ташкил этади.
