2026 йилги жаҳон чемпионатининг биринчи туридан ўрин олган Ўзбекистон — Колумбия учрашуви олдидан Ўзбекистон миллий терма жамоаси бош мураббийи Фабио Каннаваро ҳамда жамоа сардори Элдор Шомуродов иштирокида расмий матбуот анжумани бўлиб ўтди.

Фабио Каннаваро:

— Хайрли кеч барчага. Бу биз учун илк жаҳон чемпионати ҳисобланади. Эртага барча мухлисларимиз бизни томоша қилади, барча футболчиларимиз ўйинга тайёр.

— Абдуқодир Ҳусанов, албатта, муҳим ҳимоячиларимиздан бири. У ҳали янада юқори даражага чиқиш имкониятига эга. Айни пайтда ҳам юқори савияда ўйин кўрсатиб келмоқда.

— Ўйлайманки, биз бу ерга энг яхши фазилатларимизни, ўзбек халқининг менталитетини намойиш қилиш учун келганмиз. Мен жамоа билан ишлаш жараёнида ўз тажрибамни улашишга ҳаракат қилдим. Чунки мен ҳам бир вақтлар жаҳон чемпионатида илк бор майдонга тушганман ва шу тажрибаларимни футболчиларга етказяпман.

— Колумбия ва Португалия юқори даражадаги жамоалар. Улар таркибида кучли футболчилар бор. Уларга қарши эҳтиёткорлик билан ҳаракат қиламиз. Бироқ Колумбияда фақат Хамес Родригес эмас, балки кўплаб юқори савиядаги футболчилар ҳам бор.

— Колумбияни таҳлил қилдик, улар учрашувни охиригача юқори суръатда ўтказади. Биз ҳам ўз имкониятларимизни намойиш этиш учун майдонга тушамиз.

— Мен бу стадионга аввал ҳам келганман. Бу ерда Диего Марадона ўзининг энг ёрқин голларидан айримларини урган. Биз ҳам ушбу тарихий стадионда илк ўйинимизни ўтказаётганимиздан мамнунмиз.

— Менинг фикримча, нимагадир эришмоқчи бўлсангиз, қийинчиликлардан ўтишингиз керак. Ўзингизни исботлашингиз лозим. Машғулотларда қийинчиликлар бўлиши табиий ҳолат.

— ЎФА академиялар ва инфратузилмага жуда катта эътибор қаратмоқда. Мамлакатда футбол ривожланиб бормоқда. Бу Ўзбекистон учун илк жаҳон чемпионати. Мен Ўзбекистоннинг биринчи жаҳон чемпионатида бош мураббий сифатида иштирок этаётганимдан хурсандман.

Элдор Шомуродов:

— Жамоада кайфият аъло даражада. Биз илк бор жаҳон чемпионатида иштирок этяпмиз. Ҳаяжон бор, аммо ҳеч қандай босим йўқ. Барча футболчилар ушбу учрашувни интиқлик билан кутмоқда.

— Узоқ кутилган жаҳон чемпионатида терма жамоа сардори сифатида иштирок этиш мен учун катта ғурур. Эртага ижобий натижа қайд этишимизга умид қиламан. Халқимиздан эса бизни қўллаб-қувватлашини сўраб қоламан. Бизда босим йўқ, жамоамиз эртанги ўйинга тўлиқ тайёр бўлади.