Хорватия терма жамоаси сардори Лука Модрич олтинчи бор жаҳон чемпионатида иштирок этган кам сонли футболчига айланди. Бундай номга Аргентина сардори Лионель Месси ва Португалия етакчиси Криштиану Роналду ҳам сазовор бўлди. Агар Мексика дарвозабони Гилермо Очоа 3-турда майдонга тушса, у ҳам мана шундай рекорд соҳибига айланади.
Энг тартибли футболчи ҳисобланган Лука Модрич билан боғлиқ қизиқарли факт. Англияга қарши ўйинда Модрич ўз жарима майдончаси ичида қўполлик содир этиб, пенальтига сабабчи бўлганди. Бу Модричнинг фаолиятидаги илк бундай ҳолат.
Хорватия терма жамоасидаги яна бир футболчи ўзига хос натижа қайд этди. Англияга қарши ўйинда Петар Мусага голли узатма бериб, Иван Перишич тўрт ёки ундан ортиқ Жаҳон чемпионатларида ассист қилган иккинчи футболчига айланди. Бешта Жаҳон чемпионатида голли узатма берган Лионель Месси бу рўйхатда биринчи ўринда турибди. Месси бу кўрсаткични яхшилаши имконига эга.
Месси ҳақида гапирганда, Криштиану Роналдуни тилга олмасликнинг иложи йўқ. У ҳозирда миллий терма жамоаси сафида ўндан ортиқ йирик турнирларда қатнашган европаликлар рўйхатида етакчилик қилмоқда. Криштиану жами 12 та мусобақада қатнашган. Бу рўйхатда иккинчи ўринда юқорида тилга олинган Лука Модрич туради, у 10 та йирик турнирда иштирок этган.
Конгога қарши ўйинда майдонга тушган Криштиану Роналду яна бир рекордни янгилади: у Жаҳон чемпионати тарихида ўйинни бошлаган энг кекса ўйинчи бўлди. У майдонга тушганида 41 ёшу 132 кунлик эди.
Аргентина Жазоир устидан қозонилган ғалабадан сўнг, Лионель Месси Жаҳон чемпионатидаги ғалабалар бўйича Мирослав Клозенинг рекордини такрорлади. Энди ҳар иккала ўйинчида ҳам 17 та ғалаба бор ва Месси Клозенинг рекордини янгилаш учун барча имкониятларга эга.
Бундан ташқари, мундиалнинг яна бир юлдузи Килиан Мбаппе Сенегал дарвозасига урган иккита голи билан Франция терма жамоасининг энг яхши тўпурарига айланди. Аввалроқ тўпурарлар баҳсида Оливье Жиру етакчилик қилаётганди.
Швецияга қарши ўйинда 5:1 ҳисобида мағлуб бўлган Тунис Жаҳон чемпионати давомида ишдан бўшатилган мураббийлар сони бўйича рекордчига айланди. Улар буни тарихда икки маротаба амалга оширишган. Охирги марта 1998-йилда, Тунис мураббийи Генри Касперчак иккинчи турдан кейин ишдан бўшатилганди.
