АҚШ терма жамоаси Жаҳон чемпионати гуруҳ босқичи 2-турида Австралия терма жамоаси устидан 2:0 ҳисобида ғалаба қозонди. Учрашув Сиэтлдаги (АҚШ) «Люмен Филд» стадионида бўлиб ўтди.
Ўйиннинг 11-дақиқасида Кэмерон Бёржесснинг автоголи эвазига америкаликлар ҳисобни очишди. 44-дақиқада эса Александр Фриман ўз номини таблога ёздириб қўйди. Шу тариқа, АҚШ Жаҳон чемпионатлари тарихида кетма-кет иккита ўйинда рақиблари ўз дарвозасини ишғол қилган (автогол муаллифи бўлган) илк жамоага айланди.
АҚШ терма жамоаси 6 очко билан «D» гуруҳида пешқадамлик қилмоқда. Ушбу муваффақият туфайли америкаликлар ЖЧ-2026 плей-офф босқичи йўлланмасини нақд қилишди. Австралия эса 3 очко билан турнир жадвалида иккинчи ўринда бормоқда.
Гуруҳ босқичининг сўнгги турида, 26 июнь куни АҚШ терма жамоаси Туркияга қарши майдонга тушса, австралияликлар Парагвай билан куч синашади.
