Мадриднинг «Реал» клуби «Комо» ярим ҳимоячиси Николас Пасни қайта сотиб олиш опциясини фаоллаштиришни режалаштирмоқда. Бу ҳақда таниқли журналист Джанлука Ди Марцио хабар бермоқда.

Аввалроқ «Реал» Бернарду Силва трансферидан сўнг Пасни ортга қайтармаслиги катта эҳтимол эканлиги ҳақида хабар берилган эди. Бундан ташқари, аргентиналик футболчининг ўзи ҳам «қаймоқранглилар» лагерига қайтишни истамаётган эди.

Бироқ, манбанинг таъкидлашича, эндиликда «Реал» 21 ёшли ярим ҳимоячининг шартномасини сотиб олишга қатъий қарор қилган. Шу билан бирга, футболчи Мадридда қолиши амримаҳол. Клуб раҳбарияти ушбу трансфер орқали яхшигина даромад ишлаб олиш мақсадида уни Англия Премьер-лигаси клубларидан бирига сотиб юбориш вариантини кўриб чиқмоқда.

Якунланган мавсумда Пас барча мусобақаларда жами 40 та учрашувда майдонга тушиб, 13 та гол урди ва 8 та голли узатмани ўз ҳисобига ёздириб қўйди.