Бразилия терма жамоаси вингери Винисиус Жуниор жамоадоши Рафинья Диаснинг жароҳати ҳақида фикр билдирди. Футболчи Жаҳон чемпионати–2026 гуруҳ босқичининг 2-туридан ўрин олган Гаитига қарши ўйинда (3:0) шикастланиб, майдонни эрта тарк этган эди.
«Жароҳат олиш ҳар қандай вазиятда оғир. Бу мавсумда у жароҳатлар туфайли анча қийналди. Умид қиламанки, жиддий ҳеч нарса йўқ. Рафинья — биз учун жуда муҳим футболчи», — деди Винисиус учрашувдан сўнг.
Икки турдан кейин Бразилия терма жамоаси 4 очко билан "C" гуруҳида пешқадамлик қилмоқда. Карло Анчелотти шогирдлари гуруҳ босқичининг сўнгги турида Шотландияга қарши майдонга тушади. Ўйин 25 июнь куни Тошкент вақти билан соат 03:00 да бошланади.
