Кабо-Верде терма жамоаси голкипери Возиньянинг онаси ниҳоят АҚШга етиб келишга муваффақ бўлди ва Жаҳон чемпионати доирасида Уругвайга қарши бўлиб ўтадиган бўлажак учрашувда миллий жамоани бевосита стадиондан туриб қўллаб-қувватлайди.
Бундан олдинроқ, ушбу аёл Америка визасини олишда қийинчиликларга дуч келгани ва шу сабабли ўғлининг Жаҳон чемпионатидаги дебют ўйинига кела олмагани ҳақида хабар берилган эди. Бироқ эндиликда барча муаммолар ҳал этилди ва у жамоанинг навбатдаги баҳси бўлиб ўтадиган Майами шаҳрига етиб келди. Бу ҳақда Globo нашри хабар тарқатди.
Эслатиб ўтамиз, 1-турда Кабо-Верде терма жамоаси кучли Испания билан 0:0 ҳисобида дуранг ўйнаб, катта сенсация қайд этганди. Ўша учрашувда Возинья 7 та даҳшатли сейв ижро этиб, ўйиннинг энг яхши футболчиси деб топилган ва баҳснинг бош қаҳрамонига айланган эди. Ушбу ўйиндан сўнг, ижтимоий тармоқларда тажрибали дарвозабонга обуна бўлганлар сони бирданига 14 миллиондан ошиб кетди.
Кабо-Верде ва Уругвай ўртасидаги баҳс Тошкент вақти билан 22 июнь куни соат 01:00 да бошланади.
