Франциянинг «ПСЖ» клуби «Вест Хэм» ярим ҳимоячиси Матеуш Фернандеш ва вингер Крисенсио Саммервиллнинг трансфери бўйича ҳеч қандай музокара олиб бормаяпти. Бу ҳақда таниқли инсайдер Фабрицио Романо хабар бермоқда.

Манбанинг таъкидлашича, Париж клуби шунчаки ушбу ўйинчилар ҳақида маълумот тўплаган, холос, чунки клуб скаутлари мунтазам равишда кўплаб футболчиларни шу тарзда кузатиб боришади. Ҳозирги вақтда «ПСЖ» ва «Вест Хэм» ўртасида ҳеч қандай музокара йўқ ва Франция чемпионлари томонидан бу борада ҳеч қандай фаол ҳаракатлар амалга оширилмаяпти.

Якунланган мавсумда 21 ёшли Фернандеш барча турнирларда 42 та ўйинда майдонга тушиб, 5 та гол урди ва 5 та голли узатмани амалга оширди.

24 ёшли Саммервилл эса 34 та учрашувда майдонга тушиб, ўз ҳисобига 7 та забит этилган тўп ва 5 та ассистни ёздириб қўйган.