Таниқли инсайдер Фабрицио Романо «Марсель» ҳужумчиси Мэйсон Гринвуднинг Лондоннинг «Тоттенхэм» клубига ўтиши мумкинлиги ҳақидаги хабарларга изоҳ берди.

Бундан олдинроқ, Франциянинг нуфузли L’Equipe нашри 24 ёшли англиялик футболчига бир йўла бир нечта гранд клублар, жумладан, «Арсенал», «Тоттенхэм» ва «Рома» қизиқиш билдираётгани ҳақида хабар тарқатган эди. Шу билан бирга, футболчининг ўзи ҳам фаолиятини бошқа кучлироқ чемпионатда давом эттириш вариантини истисно этмаётгани айтилганди.

Бироқ Романо «шпорлар» билан ҳеч қандай музокара олиб борилмаётганини айтиб, бу маълумотни рад этди.

«Тоттенхэм» Мэйсон Гринвудни сотиб олиш устида ишламаяпти, бу борада тарқалган хабарлар ҳақиқатга тўғри келмайди», — деб ёзди журналист ўзининг Х (собиқ Twitter) ижтимоий тармоқдаги саҳифасида.

Якунланган мавсумда Гринвуд «Марсель»нинг ҳақиқий етакчиларидан бирига айланди. У француз клуби сафида барча мусобақаларда 45 та ўйинда майдонга тушиб, 26 та гол урди ва 11 та голли узатмани амалга оширди. Мана шундай ёрқин ўйин орқали у яна Европанинг етакчи жамоалари эътиборини тортди.

Қайд этилишича, «Марсель» клуби шартномаси 2029 йилгача мўлжалланган ўз юлдузи билан хайрлашишни истамаяпти. Шунга қарамай, агар жуда йирик ва даҳшатли таклиф тушса, Прованс клуби футболчининг сотувини кўриб чиқиши мумкин.

Эслатиб ўтамиз, ўтган ёзда «Марсель» Гринвудни «Манчестер Юнайтед»дан тахминан 30 миллион евро эвазига сотиб олган эди. Шу билан бирга, инглиз клуби футболчининг кейинги сотувидан тушадиган соф фойданинг 40 фоизини ўзида сақлаб қолган.