Бельгия миллий терма жамоаси ва “Манчестер Сити” клуби вингери Жереми Доку ўзининг биринчи фарзанди туғилиши муносабати билан Жаҳон чемпионати қароргоҳини тарк этиш ниятида эканлигини маълум қилди. Унинг бу қарори футбол жамоатчилигида турлича баҳсларни келтириб чиқарди.

24 ёшли футболчининг рафиқаси июль ойининг иккинчи ҳафтасида фарзандли бўлиши кутилмоқда. Доку ҳатто Бельгия терма жамоаси турнирда ўз иштирокини давом эттираётган (масалан, чорак финал босқичида) бўлса ҳам унинг ёнига қайтишни режалаштирмоқда.

“Бу менинг тўнғич фарзандим, шунинг учун албатта у ерда бўлишни хоҳлайман. Ҳеч ким ўз фарзандининг туғилишини ўтказиб юборишни истамайди. Бироқ мен футболда бошқа омиллар ҳам борлигини тушунаман. Федерация ҳар доим ўйинчиларни қўллаб-қувватлайди ва вазиятимизни тўғри баҳолайди. Нима қила олишимизни вақт кўрсатади”, деди Доку Reuters нашрига берган интервьюсида.

Бироқ, футболчининг АҚШдаги турнирни ташлаб, уйга қайтиш режаси Франциянинг L'Equipe канали бошловчиси Франс Пьеррон томонидан кескин танқид қилинди. У ўзининг ижтимоий тармоқдаги саҳифасида фарзанд туғилишида отанинг иштироки борасида ўта баҳсли фикр билдирди:

“Жаҳон чемпионати — бу бахт. Сенинг ўрнингда бўлишни орзу қиладиган юзлаб футболчилар бор. Бундай имконият ҳаётингда бошқа ҳеч қачон берилмаслиги ҳам мумкин. Сен болаликдаги орзуйинг билан яшаяпсан, лекин фарзандингнинг туғилишида иштирок этиш учун буларнинг барчасидан воз кечмоқчисан. Ёқимсиз эшитилса ҳам айтаман, бу шундай жараёнки, унда отанинг умуман кераги йўқ”.

Пьерроннинг ушбу сўзлари интернетда катта резонанс келтириб чиқарди ва кўпчилик Докунинг ёнини олди. Хусусан, бокс бўйича 2000-йилги Олимпиада чемпиони франциялик Браим Аслум шундай ёзди: “Чақалоқ — бу сенинг бутун ҳаётинг. Жаҳон чемпионати эса қачондир тугайди”.

Кейинроқ, Пьеррон ўзининг X (собиқ Twitter) саҳифасида баёнот бериб, узр сўрашга мажбур бўлди. “Мен шунчаки баҳсли мавзу атрофида ўз шахсий фикримни билдиргандим. Тушунаман, бу сўзларим кимларгадир оғир ботган бўлиши мумкин, бунинг учун узр сўрайман. Оталарнинг ўрни ва ролини пасайтириш ниятим бўлмаган”, деб ёзади телебошловчи.

Маълумот учун, Жереми Доку касаллиги сабабли Г гуруҳининг 2-туридан ўрин олган Эрон терма жамоасига қарши баҳсни ўтказиб юборди. Руди Гарсия шогирдлари ушбу беллашувда 0:0 ҳисобида дуранг (1:1) ўйнади.