Халқаро футбол федерацияси (ФИФА) 2026 йилги жаҳон чемпионати плей-офф баҳсларида пенальтилар сериясини ўтказиш тартибига ўзгартиш киритишни режалаштирмоқда.
Маълум қилинишича, ташкилот Халқаро футбол ассоциациялари кенгаши (IFAB)га амалдаги қоидани ўзгартириш бўйича мурожаат қилган. Янги таклифга кўра, пенальтилар серияси олдидан фақат бир марта қуръа ташланади.
Қуръада ғолиб чиққан жамоа биринчи бўлиб зарба бериш ёки қайси дарвоза томон пенальти тепишни танлаш ҳуқуқига эга бўлади. Мағлуб бўлган жамоа эса қолган вариантни танлайди.
Эслатиб ўтамиз, ЖЧ-2026 плей-офф босқичи 28 июнь куни старт олади. Айни пайтга келиб Германия, АҚШ, Мексика ва Аргентина терма жамоалари 1/16 финал йўлланмасини кафолатлаб бўлишган.













