"Нефтчи" мураббийлар штаби аъзоси, таҳлилчи (аналитик) мураббий Факундо Стик ўзаро келишувга кўра клубдаги фаолиятини якунлади.
Бунга мутахассиснинг Европанинг нуфузли жамоаларидан бири сафига қўшилгани сабаб бўлди.
"Факундо Стик жамоамиз сафига мавсум аввалида келиб қўшилган бўлиб, январь ойидан буён бош мураббий Исломбек Исмоилов ва мураббийлар штабига аналитика йўналишида яқиндан ёрдам бериб келди. Унинг замонавий футболга бўлган қарашлари, рақибларни таҳлил қилишдаги тажрибаси ҳамда ўз ишига бўлган профессионал ёндашуви жамоамизнинг кўплаб муваффақиятларида муҳим ўрин тутди.
Мутахассис март ойида жамоамиз билан биргаликда Ўзбекистон Суперкубогини қўлга киритиб, клубимиз тарихидаги ёрқин саҳифалардан бирига ўз ҳиссасини қўшди. Қисқа вақт ичида у нафақат малакали мутахассис, балки жамоамизнинг ҳурматга сазовор инсонларидан бирига айланди.
Факундо Стикка клубимиз номидан унинг фидокорона меҳнати, профессионаллиги ва жамоамиз ривожи йўлида қўшган ҳиссаси учун самимий миннатдорлик билдирамиз", — дейилади "Нефтчи" матбуот хизмати тарқатган хабарда.













