"Neftchi" murabbiylar shtabi a’zosi, tahlilchi (analitik) murabbiy Fakundo Stik o‘zaro kelishuvga ko‘ra klubdagi faoliyatini yakunladi.

Bunga mutaxassisning Yevropaning nufuzli jamoalaridan biri safiga qo‘shilgani sabab bo‘ldi.

"Fakundo Stik jamoamiz safiga mavsum avvalida kelib qo‘shilgan bo‘lib, yanvar oyidan buyon bosh murabbiy Islombek Ismoilov va murabbiylar shtabiga analitika yo‘nalishida yaqindan yordam berib keldi. Uning zamonaviy futbolga bo‘lgan qarashlari, raqiblarni tahlil qilishdagi tajribasi hamda o‘z ishiga bo‘lgan professional yondashuvi jamoamizning ko‘plab muvaffaqiyatlarida muhim o‘rin tutdi.

Mutaxassis mart oyida jamoamiz bilan birgalikda O‘zbekiston Superkubogini qo‘lga kiritib, klubimiz tarixidagi yorqin sahifalardan biriga o‘z hissasini qo‘shdi. Qisqa vaqt ichida u nafaqat malakali mutaxassis, balki jamoamizning hurmatga sazovor insonlaridan biriga aylandi.

Fakundo Stikka klubimiz nomidan uning fidokorona mehnati, professionalligi va jamoamiz rivoji yo‘lida qo‘shgan hissasi uchun samimiy minnatdorlik bildiramiz", — deyiladi "Neftchi" matbuot xizmati tarqatgan xabarda.