Парагвай футбол ассоциацияси Англия терма жамоаси ярим ҳимоячиси Жуд Беллингемни жазолаш талаби билан ФИФАга расмий шикоят йўллади.
Mirror нашрининг хабар беришича, бунга ЖЧ-2026 гуруҳ босқичидаги Англия — Гана учрашувида содир бўлган эпизод сабаб бўлган. Унда Беллингем рақиб ҳужумчиси Жордан Айю билан мулоқот қилаётган вақтда оғзини қўли билан беркитган.
Парагвай томони ФИФА низомлари бир хил қўлланилмаётганини таъкидламоқда. Чунки ушбу турнирда аввалроқ Парагвай терма жамоаси ярим ҳимоячиси Мигель Альмирон Туркияга қарши баҳсда худди шундай ҳаракати учун тўғридан-тўғри қизил карточка олган эди.
Мазкур қоида турнир бошланишидан олдин ФИФА томонидан жорий этилган. Бунга «Бенфика» вингери Жанлука Престианнининг Винисиус Жуниорга нисбатан ҳақоратли сўзлари учун дисквалификация қилиниши сабаб бўлган.
Беллингем эса майдонда четлатилмади, чунки ҳакамлар унинг ҳаракатини рақиб билан можаро ёки тажовузкор мулоқот сифатида баҳолашмади.
Амалдаги низомга кўра, оғизни қўл билан беркитиш учун тўғридан-тўғри қизил карточка фақат ушбу ишора рақиб билан тўқнашув ёки агрессив мулоқот жараёнида қўлланган ҳолатларда берилади.













