"Челси" ярим ҳимоячиси Коул Палмер Англия терма жамоасининг Жаҳон чемпионати — 2026 учун қайдномасидан жой олмагани борасида илк бор оммавий равишда фикр билдирди. Футболчи ҳозирда мавсумлараро танаффусни Испаниянинг Ибица оролида ўтказмоқда.
"Бу ёзда яхшилаб дам олмоқчиман. Сўнгги 3-4 йил ичида илк бор куч йиғиб, тикланиб олмоқчиман ва кейин ўзим яхши кўрган ишга қайтаман", — деди Палмер "i-d.co" нашрига берган интервьюсида.
Эслатиб ўтамиз, ушбу футболчи Гарри Магуайр, Фил Фоден ва Трент Александер-Арнольд каби бир қатор бошқа машҳур ўйинчилар қатори Англия терма жамоасининг Жаҳон чемпионати учун қайдномасига киритилмаган эди.
"Бу мавсум фаолиятимдаги энг яхшиси бўлмади, аммо бу энди ҳеч нарсани ўзгартирмайди. Мен ўзгартириб бўлмайдиган қарор туфайли куйиб-пишмоқчи эмасман ва жамоага муваффақият тилайман", — дея таъкидлади у.
Шунингдек, футболчи агар дам олиш жадвали йўл қўйса, Англия терма жамоасининг учрашувларини кузатиб бориш ниятида эканлигини қўшимча қилди.
