Жума, 26 июнь куни Эквадорда расман дам олиш куни деб эълон қилинди. Бундай қарорни мамлакат президенти Даниэль Нобоа қабул қилди.
Бунга Эквадор терма жамоасининг жаҳон чемпионати гуруҳ босқичи сўнгги турида Германия устидан қозонган ғалабаси (2:1) сабаб бўлди. Ушбу ғалаба туфайли жамоа 20 йил ичида илк бор гуруҳ босқичидан муваффақиятли ўтди.
«Танқидлар, ҳақоратлар ва оғир дамларга қарамай, ўзларини тиклаб олишга ҳамда бутун мамлакатга улкан қувонч бахш этишга муваффақ бўлган футболчилар ва мураббийга миннатдорчилик билдираман. Яшасин Эквадор!» — деб ёзди давлат раҳбари ўз ижтимоий тармоқларида.
Эквадор жамоаси таркибида Нильсон Ангуло ва Гонсало Плата гол уришди. Немислар бунга Лерой Саненинг аниқ зарбаси билан жавоб қайтаришди.
