Бельгия терма жамоаси бош мураббийи Руди Гарсия ЖЧ-2026 доирасида Янги Зеландия устидан қозонилган ва жамоага гуруҳда биринчи ўринни тақдим этган ғалаба (5:1) ҳақида фикр билдирди.

«Бугун бизга фақат ғалаба зарур эди ва биз ғалаба қозонишга муваффақ бўлдик – бунинг устига тўғри тарзда. Энг муҳими шу. Футболчилар мен улардан кутгандек ҳаракат қилишди. Мен йигитларга ишонгандим.

Бугун биз самарали ўйнадик – аввалги ўйинлардан ягона фарқи шунда. Турнир биз учун энди бошланяпти, деб ҳисобламайман. У биринчи ўйиндан бошланган. Биз бир маромда бошладик, аммо ҳозир тезликни оширишимиз мумкинлигини ҳис қиляпмиз. Шунга қарамай, хотиржамликни сақлаш керак.

Биз гуруҳда биринчи бўлдик, лекин ҳозирча бор-йўғи шу», – деди Гарсия.