Колумбия терма жамоаси сардори Хамес Родригес ЖЧ-2026 доирасида Португалияга қарши кечган дуранг ўйиндан сўнг Криштиану Роналду ҳақидаги саволга жавоб берди.
Жамоалар учрашувда томошабинларни голлар билан қувонтира олишмади — 0:0. Колумбияликлар 7 очко жамғариб, гуруҳда биринчи ўринни эгаллашган бўлса, португалияликлар 5 очко билан иккинчи поғонадан жой олишди.
«Биз Роналду билан гаплашдик. Криштиану — ажойиб дўст ва аҳил инсон. «Реал»да бирга ўйнаган вақтларимизда мен унинг уйида тез-тез меҳмон бўлардим. У барчага жуда ажойиб ўрнак бўла олади: унинг ёши 41 да, лекин унинг ўзига ва жисмоний ҳолатига (танасига) бир қаранг. Бу инсон улкан ҳурматга лойиқ», — дея Хамеснинг сўзларини Madrid Xtra нашри келтирмоқда.
Жаҳон чемпионатининг 1/16 финалида Колумбия Гана билан, Португалия эса Хорватия билан куч синашади.
