Мадриднинг «Реал» клуби марказий ҳимоячиси Хоан Мартинес «Валенсия» қизиқишлари доирасига тушиб қолди.

18 ёшли футболчи жуда истиқболли ҳисобланади, бироқ «қаймоқранглилар»нинг асосий таркибида ҳали дебют қилгани йўқ — у «Кастилья» (клубнинг иккинчи жамоаси) сафида тажриба тўплашда давом этмоқда. Marca нашри тарқатган маълумотларга кўра, «Валенсия» ёш испанияликни кейинги мавсум охиригача ижарага олишни режалаштирмоқда.

Эътиборлиси, Хоан Мартинес ўз фаолиятини айнан Валенсия шаҳрида жойлашган «Леванте» академиясида бошлаган. Якунланган мавсумда футболчи «Реал»нинг иккинчи жамоаси сафида 33 та ўйинда майдонга тушиб, 3 та гол уришга муваффақ бўлди. Transfermarkt портали марказий ҳимоячининг трансфер баҳосини 5 миллион еврога баҳоламоқда.