Кот-д'Ивуар терма жамоаси вингери Ян Диоманде Германия клубининг уни таркибда сақлаб қолиш нияти ҳақидаги сўнгги баёнотларига қарамай, шу ёзда «РБ Лейпциг»дан кетишни кутаётганини маълум қилди.

Жаҳон чемпионатининг 1/16 финали доирасидаги Норвегияга қарши ўйин олдидан ўтказилган матбуот анжуманида 19 ёшли футболчи бор эътиборини миллий терма жамоадаги иштирокига қаратганини, бироқ турнир якунлангач, клубини ўзгартиришдан умид қилаётганини тан олди.

«Менинг орзум — ўз ватаним шарафини ҳимоя қилиш ва у билан бирга тарихга кириш. Мен миш-мишларни кузатмаяпман, лекин жамоадан кетишимни кутяпман. Менда бошқа барча масалалар билан шуғулланадиган агент бор. Ҳозир мен учун энг муҳими — Жаҳон чемпионати», — деди Диоманде.

Сўнгги кунларда Диоманденинг «Пари Сен-Жермен» клубига ўтиши борасидаги хабарлар фаоллашди. Шунингдек, ивуарлик иқтидор эгасига Мадриднинг «Реал» ва «Ливерпуль» клублари ҳам қизиқиш билдираётгани айтилмоқда.

Якунланган мавсумда Диоманде «РБ Лейпциг» сафида 36 та ўйинда майдонга тушиб, 13 та гол урди ва 10 та голли узатмани амалга оширди.