Мексика терма жамоаси бош мураббийи Хавьер Агирре жаҳон чемпионатининг 1/16 финали доирасида Эквадорга қарши ўйин олдидан ўз фикрларини билдирди. Учрашув 1 июль куни «Ацтека» стадионида бўлиб ўтади.

«Ўз майдонимиздаги трибуналар — бу бизнинг ўн иккинчи ўйинчимиз. Бизни бошқа жойларда қўллаб-қувватлашмайди демоқчи эмасман, лекин ортимизда бутун мамлакат турганини биламиз ва бу бизга жуда катта мотивация беради. Барчамиз бўлажак ўйинни интизорлик билан кутяпмиз, дейиш мумкин», — дея мутахассиснинг сўзларини келтиради ESPN.

Мураббийнинг сўзларига кўра, ҳозирда жамоада яхши муҳит ҳукмрон:

«Жамоа ичида ҳам қувончли кайфият ҳукм сурмоқда. Бу ҳатто машғулотларда ҳам сезилиб турибди. Шу билан бирга, улар тартиб-интизомли ва жиддий меҳнат қилишмоқда. Мен миллий терма жамоада биринчи марта ишлаётганим йўқ, лекин ҳозир жуда яхши ҳолатдамиз».

Мексика гуруҳ босқичини ҳеч қандай йўқотишларсиз ўтказиб, 9 очко жамғарди. Эквадор эса Германия ва Кот-д’Ивуарни ўзидан олдинга ўтказиб юбориб, ўз гуруҳида учинчи ўринни эгаллади.

Мексика — Эквадор учрашуви ғолиби 1/8 финалда Англия — Демократик Республика Конго жуфтлиги ғолиби билан тўқнаш келади.