«Арсенал» ҳужум чизиғини кучайтиришни режалаштирмоқда. Лондон клубининг трансфер бозоридаги асосий мақсади «Астон Вилла» аъзоси Морган Рожерс бўлиб турибди, бироқ бирмингемликлар томонидан белгиланган 130 миллион фунт стерлинг миқдоридаги нарх ушбу келишув учун жиддий тўсиқ бўлиши мумкин.
BBC нашрининг хабар беришича, Роджерс трансферидаги қийинчиликлар фонида «Арсенал» шу ҳафтада «ПСЖ» ҳужумчиси Брэдли Барколага бўлган қизиқишини янада кучайтиради. Лондонликлар Барколани шу ёзда сотиб олиш имконияти борлиги ҳақида ишора олишган. «Канонирлар» ушбу футболчини анчадан бери кузатиб келишмоқда.
23 ёшли Брэдли Баркола нуфузли Transfermarkt портали мутахассислари томонидан 70 миллион еврога баҳоланмоқда.
