Қироллик Испания футбол федерацияси (RFEF) мамлакат Суперкубогини ўтказиш муддати ўзгарганини эълон қилди — мусобақа 2027 йилнинг февраль ойи бошига кўчирилди. Бу ҳақда Marca нашри хабар бермоқда.
Манбанинг хабарига кўра, турнир Саудия Арабистонида бўлиб ўтмайди, чунки ушбу мамлакат айни ўша вақтда Осиё Кубогига мезбонлик қилади. Шу сабабли, RFEF жорий мавсумдаги Суперкубок баҳсларини ўтказиш учун янги жой топиши керак.
RFEF президенти Рафаэль Лоусан ҳам ушбу турнир испан футболи учун, жумладан, иқтисодий нуқтаи назардан жуда катта аҳамиятга эга эканлигини таъкидлаб ўтди. Сабаби мусобақа тахминан 53 миллион евро даромад келтиради ва бу маблағ мамлакатдаги бутун футбол тизими бўйлаб тақсимланади. Бироқ Саудия Арабистони ўрнини эгаллайдиган мезбон давлат қандай шартлар асосида танланиши ҳозирча номаълум.
Аввалроқ, ушбу турнирга Қатар давлати мезбонлик қилиш эҳтимоли жуда юқори эканлиги хабар қилинган эди.
