Аргентина терма жамоаси ва Лионель Месси Жаҳон чемпионатининг 1/16 финал учрашувида иштирок этиш учун йўл оладиган самолётга чиқиш олдидан аэропортда кучайтирилган назоратдан ўтишга мажбур бўлди.
Қайд этилишича, узоқ давом этган текширув жараёни аргентиналик футболчиларнинг кайфиятига салбий таъсир кўрсатмаган. Аргентина терма жамоаси 1/16 финал босқичи доирасида 4 июлга ўтар кечаси Маями шаҳрида Кабо-Верде термасига қарши майдонга тушади.
Эслатиб ўтамиз, жорий Жаҳон чемпионати АҚШ, Мексика ва Канада майдонларида бўлиб ўтмоқда. Тарихда илк бор 48 та жамоа иштирок этаётган мазкур турнир 19 июль куни якунига етади. Аргентина терма жамоаси амалдаги Жаҳон чемпиони ҳисобланади.
Аввалроқ, Ўзбекистон миллий терма жамоаси Жаҳон чемпионатига тайёргарлик доирасида Нидерландияга қарши ўртоқлик учрашувида майдонга тушган. Беллашувда иштирок этиш учун стадионга етиб борган Ўзбекистон терма жамоаси вакиллари АҚШ хавфсизлик ходимлари томонидан алоҳида кўздан кечирилган ва жамоа автобусидан тушаётган мураббийлар штаби ҳамда футболчилар метал детекторлар ҳамда хизмат итлари томонидан обдан текширилган эди.













