Кабо-Верде терма жамоаси посбони Жозимар Возинья ижтимоий тармоқлардаги обуначилари сони бўйича дарвозабонлар ўртасида тарихий рекорд ўрнатди. Унинг кузатувчилари аудиторияси 25,2 миллион нафардан ошиб кетди.

Шу тариқа, Возинья Мадриднинг «Реал», «Порту» клублари ҳамда Испания терма жамоаси афсонаси Икер Касильясни ортда қолдиришга муваффақ бўлди (Касильясда 20,5 миллион обуначи бор).

Ҳозирда фаолиятини давом эттираётган дарвозабонлар орасида Возиньянинг энг яқин таъқибчиси яна бир «Реал» вакили — Тибо Куртуа (18 миллион) бўлиб турибди.

Эслатиб ўтамиз, Возинья ЖЧ–2026 гуруҳ босқичининг илк турида Испанияга қарши кечган баҳсда Кабо-Верде терма жамоасининг ҳақиқий қаҳрамонига айланган эди. Ўшанда у 7 та сейв ижро этиб, жамоасининг дуранг (0:0) қайд этишига улкан ҳисса қўшганди.

Ушбу натижалар эвазига Кабо-Верде гуруҳдан чиқишни уддалади ва 1/16 финалда фақат қўшимча бўлимлардагина Аргентинага имкониятни бой берди (2:3).