Испания терма жамоаси ҳужумчиси Ламин Ямал Жаҳон чемпионати-2026 нинг 1/16 финали доирасидаги Австрияга қарши учрашувда (3:0) ижтимоий тармоқлардаги танқидларга жавобан бошига «Ямал Эгоси» (Ego de Yamal) деб ёзилган боғлагич тақиб тушди. Бу ҳақда COPE нашри хабар бермоқда.
Қайд этилишича, ижтимоий тармоқлардаги айрим фойдаланувчилар Ямални катта худбинликда (манманликда) айблаб, уни мазахомуз тарзда «Ламин Эгоси» деб аташган. Ушбу лақаб бир неча ҳафта давомида ижтимоий тармоқлардаги шарҳларда кенг тарқалиб улгурган эди.
Австрияга қарши баҳсда 18 ёшли вингер майдонда 85 дақиқа ҳаракат қилди ва самарали ҳаракатлар (гол ёки пас) амалга оширмади. Шунга қарамай, учрашув якунларига кўра, Ямал ўйиннинг энг яхши футболчиси деб топилди.
