Португалия терма жамоаси ҳужумчиси Криштиану Роналду ЖЧ-2026 1/8 финалида Испанияга қарши ўйин олдидан рақибнинг имкониятларига баҳо берди ва испаниялик иқтидорли ҳужумчи Ламин Ямал ҳақида ҳам фикр билдирди.
«Мен ҳар доим Испанияни жуда иқтидорли жамоа деб ҳисоблаганман. Ҳар бир авлодда ҳам шундай бўлган. Улар ҳар доим ҳар қандай турнирда ғолиблик учун асосий даъвогарлардан бири ҳисобланади. Эртанги ўйин жуда қийин кечади. Бизда ишонч, ҳаракатчанлик ва жасорат бўлиши керак. Ғалаба қозонишнинг ягона йўли шу.
Назарий жиҳатдан Испания фаворит, чунки улар кўпроқ соврин ютган. Мен Испанияга қарши ўйнашни яхши кўраман. Уларга қарши бир неча марта майдонга тушганман ва ҳар сафар баҳслар жуда кескин ўтган. Эртага ҳам худди шундай бўлади. Майда жиҳатларга кўпроқ эътибор қаратган жамоа ғалаба қозонади. Умид қиламанки, бу Португалия бўлади. Менда шундай ҳиссиёт бор. Қолганини эса эртага кўрамиз».
Роналду Испания терма жамоасининг ёш юлдузи Ламин Ямал ҳақида ҳам ўз муносабатини билдирди.
«Ламинни буюк келажак кутмоқда. Ростини айтсам, Испаниянинг тўлиқ ўйинларини ҳали томоша қилмадим, фақат Кабо-Вердега қарши биринчи учрашувидан бир қисмини кўрдим. Аммо унинг келажаги жуда ёрқин. У жуда яхши ўйин кўрсатмоқда. Бироқ мен ҳар доим Испанияни алоҳида футболчилар эмас, балки жамоа сифатида баҳолайман. Улар жуда яхши ўйнайди ва бизни жуда оғир баҳс кутиб турибди», — деди Роналду AS нашрига.
Португалия ва Испания ўртасидаги ЖЧ-2026 1/8 финал учрашуви 6 июль куни бўлиб ўтади.
