Иордания ЖЧ-2014 саралашида халқаро плей-оффга ўзлари ҳам кутмаган ҳолда чиққанларини мамлакат нашрлари алоҳида эътироф билан кутиб олганлар.

Жумладан, "Al-Ghad" нашри муқовасида "Бразилия орзусининг ҳайратли давоми - оқ бўриларга отилган ўқ нишонга тегди" сарлавҳаси кўзга ташланади. Ушбу нашр мақоласида Тошкентдаги ўйиннинг ўзи эмас, балки унинг аҳамияти, энг муҳими ғалабага эришилгани, бу ютуқнинг иордан халқига қандай қувонч келтириши ва бу тарихий рекорд ғалаба билан Иордания футболи келажаги янада ёрқинроқ бўлиши ҳақида гап боради.

"Al-Rai" газетаси "Тарихга кирдик, келажакни ютдик" сарлавҳаси билан чиққан бўлса, "Constitution" ўз мақоласига "Тошкентдаги ҳайратланарли ғалаба" дея ном берган.

Ҳуссом Ҳассан шогирдлари саралашдаги навбатдаги баҳсни ноябрда Жанубий Америка қитьасининг бешинчи жамоасига қарши ўтказади. Айни вақтда КОНМЕБОЛда Уругвай ўзидан олдиндаги Эквадордан фақат тўплар нисбатига кўра ортда қолиб бешинчи ўринда бормоқда.