Италия терма жамоаси собиқ ҳимоячиси Марко Матерацци яна бир бор ЖЧ-2006 финалини ёдга олди. Ўша ўйинда Франция терма жамоаси ярим ҳимоячиси Зинедин Зидан синглиси шаънига айтилган ҳақоратлардан сўнг италиялик футболчининг кўкрак қисмига боши билан зарба берган эди. Учрашувдан кейин улар умуман гаплашишмаган.
«Мен авлиё эмасман, лекин Зидан ҳам фаришта эмас, чунки бу унинг томонидан содир этилган биринчи бундай ҳаракат эмас эди. Агар ўйиндан кейин у келиб мен билан қўл бериб кўришганида ва ҳаммаси шу билан тугаганида, бу унинг обрўсини кўтарган бўларди. Мен уни ҳурмат қиламан ва фаолияти давомида ҳам футболчи, ҳам мураббий сифатида эришган барча ютуқлари учун ташаккур айтаман», — дея Матераццининг сўзларидан иқтибос келтиради France Football.
ЖЧ-2006 финали Зидан фаолиятидаги сўнгги ўйин бўлган эди — франциялик футболчи жамоа сардори эди ва ўша турнирнинг энг яхши ўйинчиси деб топилган. 2006 йилнинг ёзида у футболчилик фаолиятини якунлаганини эълон қилган.
