Англия терма жамоаси ярим ҳимоячиси Жордан Хендерсоннинг отаси Брайан Хендерсон ўғлининг жароҳати аввал хабар қилинганидан кўра жиддийроқ эканини маълум қилди.

36 ёшли футболчи ЖЧ-2026 1/8 финалида Мексика устидан қозонилган ғалабани (3:2) нишонлаётган вақтда жароҳат олган эди. Ярим ҳимоячи реклама шитлари устидан сакраб ўтмоқчи бўлган ва ноқулай йиқилган. Дастлаб футболчининг билак бўғими шикастлангани ҳақида хабар берилганди, бироқ катта Хендерсоннинг сўзларига кўра, ўйинчининг чап билак суяги бутунлай майдаланиб кетган.

«Бу чап билак суяги — у шунчаки бутунлай майдаланиб кетган. Унга гипс қўйишади, қолгани эса мутахассисларнинг кўрсатмасига боғлиқ бўлади», — дея Daily Mail футболчининг отаси сўзларидан иқтибос келтиради.

Чоршанба куни Хендерсон операция қилинади. Ярим ҳимоячи жаҳон чемпионати якунига қадар Англия терма жамоаси ихтиёрида қолишни режалаштирмоқда.

Англияликлар ЖЧ-2026 чорак финалида Норвегияга қарши майдонга тушади. Учрашув 11 июлдан 12 июлга ўтар кечаси бўлиб ўтади.