Миср терма жамоаси бош мураббийи Ҳоссам Ҳассан ЖЧ-2026 1/8 финалидан ўрин олган Аргентинага қарши ўйиндаги (2:3) ҳакамликдан норози бўлди.
"Менинг фикримча, биз яхшироқ ўйнадик. Аммо содир бўлган воқеалар... Назаримда, бу нотўғри. Мен ҳам инглиз тилидаги, ҳам араб тилидаги аудиторияга мурожаат қиляпман: бўлаётган ишлар адолатдан эмас. Фойдамизга пенальти белгиланиши керак эди — аввал бир вазиятда, кейин бошқасида. Нима учун бундай қилинмаганини билмайман. Шундан сўнг биз 3:1 ҳисобида олдинга чиқиб олишимиз мумкин эди. Кейин эса рақиб иккинчи тўпни киритди.
Билмадим... Балки гап маркетингдадир. Балки улар жаҳон чемпионатини тарғиб қилишни, амалдаги жаҳон чемпиони турнирда қолишини ва Мессини ЖЧда сақлаб қолишни хоҳлашаётгандир. Аммо биз қўлимиздан келган барча ишни қилдик ва буни жуда муносиб тарзда бажардик.
Мен Миср терма жамоаси мухлисларига, бутун Миср халқига, шунингдек, араб ва африкалик ишқибозларга айтмоқчиман: баъзида бор кучинг билан ишлашинг, ўзингни бутунлай бағишлашинг мумкин, бироқ вазифани анча мураккаблаштириб юборадиган омиллар мавжуд бўлади.
Албатта, кейинги босқичга чиқишимизни жуда хоҳлагандим. Мен мағлубиятни ёмон кўрадиган инсонлар тоифасиданман. Бугунгидек мағлубият ноҳақ бўлиб туюлганда эса, бу айниқса оғир ботади. Шу сабабли мухлисларимиздан сўраб қоламан — хафа бўлманглар. Биз кейинги босқичга чиқишни жуда ҳам истагандик. Ҳар бир нарса учун Аллоҳга шукр. Аммо футболда шундай нарсалар борки, улар ўйин чегарасидан чиқиб кетади.
Футболга ҳам, маҳоратга ҳам алоқаси бўлмаган омиллар бор. Ҳатто амалдаги жаҳон чемпионига қарши ўйнаётган бўлсанг ҳам, уларга ҳар томонлама ёрдам беришаётгандек туйғу пайдо бўлади. Қаерга қараманг, мана шундай қўллаб-қувватлаш мавжуд", — деди Ҳассан beIN Sports телеканалига берган интервьюсида.
