Марказий ярим ҳимоячи Шон Штер «Аякс»дан «Ньюкасл»га кўчиб ўтди. Бу ҳақда «қарғалар» матбуот хизмати хабар берди.

Таъкидланишича, 18 ёшли нидерландиялик футболчи «Ньюкасл» билан беш йиллик меҳнат шартномасини имзолаган. Ярим ҳимоячи янги жамоасида 14-рақам остида тўп суради. Трансфер суммаси ошкор қилинмаган, аммо аввалроқ Штернинг хариди «қарғалар»га 24 миллион еврога тушиши ҳақида хабар берилганди.

«Бу ерда эканимдан жуда хурсандман. Бу Премьер-лиганинг катта клуби. Мен ҳар доим дунёнинг энг яхши лигасида ўйнашни орзу қилганман, шу боис бу мен учун жуда ҳаяжонли лаҳза», — дея Штернинг сўзларини келтиради клуб матбуот хизмати.

Штер — «Аякс» тарбияланувчиси. У асосий жамоа сафида жами 26 та ўйинда майдонга тушиб, битта гол ва битта голли узатмага муаллифлик қилган.