Аргентина терма жамоаси сардори Лионель Мессининг 2026-йилги Жаҳон чемпионати энг яхши футболчиси деб топилиш эҳтимоли 88 фоизни ташкил этмоқда. Бу ҳақда Polymarket платформасининг яримфиналдан кейин янгиланган рейтингида маълум қилинди.
Платформа маълумотларига кўра, аргентиналик ҳужумчининг турнирдаги энг асосий индивидуал совринни қўлга киритиш имконияти яримфинал учрашувидан сўнг бирданига 76 фоизга кўтарилиб кетган. Рейтингда иккинчи поғонани эса 9 фоизлик кўрсаткич билан Испания терма жамоаси яримҳимоячиси Родри банд этиб турибди.
Polymarket талқини бўйича ЖЧ—2026 да йилнинг энг яхши ўйинчиси бўлиш эҳтимоли юқори бўлган футболчилар олтилиги қуйидагича кўриниш олган:
Лионель Месси (Аргентина) — 88% (+76%);
Родри (Испания) — 9% (-2%);
Ламин Ямал (Испания) — 2% (-16%);
Килиан Мбаппе (Франция) — 1% (-13%);
Жуд Беллингем (Англия) — 1%;
Ҳарри Кейн (Англия) — 1 фоиздан кам.
Эслатиб ўтамиз, ҳал қилувчи финалда Аргентина Испанияга қарши майдонга тушади. Мазкур учрашув 19-июльдан 20-июльга ўтар кечаси, Ўзбекистон вақти билан роппа-роса 00:00 да старт олади.
