Аргентина терма жамоаси ҳужумчиси Лионель Месси Жаҳон чемпионати финалига уч марта чиқишга муваффақ бўлган футболчилар сафига қўшилди.

«Интер Майами»нинг 39 ёшли форварди ЖЧ-2026 ярим финалида Англияга қарши кечган баҳс якунида иккита голли узатмани амалга ошириб, аргентиналикларга иродали ғалаба (2:1) қозонишда ёрдам берди. 19 июль куни улар кубок учун Испанияга қарши майдонга тушади.

Месси бразилиялик собиқ ҳимоячи Кафунинг натижасини такрорлаши мумкин, у кетма-кет учта финалда — 1994, 1998 ва 2002 йилларда иштирок этган. Лионель 2014 йилда Германияга қарши финалда ўйнаб, мағлубиятга учраган, 2022 йилда эса Аргентина билан Франция устидан ғалаба қозонган эди.

Бошқа бир қатор футболчилар ўз жамоалари билан уч марта Жаҳон чемпионати финалигача етиб боришган, бироқ жароҳат ёки бошқа сабабларга кўра уларнинг барчасида майдонга тушишмаган.

Пеле — тарихдаги ягона уч карра Жаҳон чемпиони (1958, 1962, 1970), лекин 1962 йилда жароҳати туфайли ҳал қилувчи ўйинда иштирок этмаган. Роналдо (1994, 1998, 2002) ўз фаолиятидаги биринчи чемпионатида майдонга тушмаган.

Германиялик Пьер Литтбарски ва Лотар Маттеус (1982, 1986, 1990) ҳам ФРГ сафида учта финалга етиб боришган, аммо уларнинг барчасида ҳам ўйнашмаган. Литтбарски 1982 ва 1990 йилларда ўйнаган, 1986 йилда эса захирада қолган, Маттеус эса ЖЧ-1982 да захира ўйинчиси бўлган.