Машҳур шотландиялик собиқ футболчи ва мураббий Грэм Сунесс «Арсенал» ва Англия терма жамоаси ярим ҳимоячиси Деклан Райснинг қобилиятларига шубҳа билан қаради.
Яқинда инглизлар ЖЧ-2026 ярим финалида Аргентина терма жамоасига имкониятни бой беришди (1:2). «Канонирлар» хавбеки ўйинда 82-дақиқагача ҳаракат қилди.
«Мен Райсни, худди Андерсон каби, имкониятлари чекланган футболчи деб ҳисоблайман. У ишончли, атлетик жиҳатдан бақувват, майдонда бор кучини беради, аммо у Родри каби тўп билан ўйинга таъсир ўтказа олмайди. Унда плеймейкерлик сифатлари йўқ. Менимча, унга марказий ҳимоячи позицияси кўпроқ мос келарди», — дея инглиз ОАВлари Сунесснинг сўзларини келтиради.
19 июль куни Тошкент вақти билан соат 02:00 да Англия ва Франция терма жамоалари ўртасидаги учинчи ўрин учун баҳс бошланади.
