«РБ Лейпциг»нинг 19 ёшли вингери Ян Диоманде ҳали ҳам Мадриднинг «Реал» клуби эътиборида қолмоқда. Бу ҳақда инсайдер Экрем Конур хабар берди.

Шу билан бирга, «қаймоқранглилар» немис клуби талаб қилаётган 120 миллион еврони тўлашга тайёр эмаслиги, «РБ Лейпциг» эса нарх борасида савдолашиш ниятида эмаслиги айтилмоқда. Қолаверса, Диомандега қизиқиш билдираётган бирорта жамоа футболчи учун бунчалик катта маблағ сарфлашни истамаяпти.

Манбага кўра, «РБ Лейпциг» ивуарлик футболчига маошини сезиларли даражада оширган ҳолда янги шартнома таклиф қилишни режалаштирмоқда, гарчи футболчининг ўзи нуфузлироқ клубга ўтишга тайёр бўлса-да.

Ўтган мавсумда Диоманде барча турнирларни ҳисобга олганда 36 та ўйинда иштирок этиб, 13 та гол урди ва 10 та голли узатмага муаллифлик қилди.