Аргентина терма жамоаси футболчилари Лионель Месси ва Родриго Де Пауль 2026 йилги жаҳон чемпионати финалидан сўнг жамоа билан бирга Аргентинага учиб кетмади. Бу ҳақда OneFootball хабар берди.
Манбага кўра, бунинг сабаби ҳар икки футболчининг «Интер Майами» клубида тўп сураётгани билан боғлиқ. Улар АҚШда яшайди ва таътилни ҳам клублари жойлашган мамлакатда ўтказишни режалаштирган.
Хабарда айтилишича, Аргентина терма жамоасининг фақат бир қисми махсус чартер рейси орқали Буэнос-Айресга қайтиб кетади. Шунингдек, пойтахтда жаҳон чемпионатининг кумуш медали соҳибларини оммавий кутиб олиш ёки тантанали тақдирлаш маросими ўтказилмаслиги таъкидланган.
Эслатиб ўтамиз, 2026 йилги жаҳон чемпионати финалида Аргентина терма жамоаси қўшимча вақтда Испанияга 0:1 ҳисобида мағлуб бўлди. Бу Испаниянинг мусобақа тарихидаги иккинчи жаҳон чемпионлиги бўлди.
