Норвегия Футбол ассоциацияси Жаҳон чемпионати вақтида АҚШ президенти Дональд Трампнинг Фоларин Балогуннинг дисквалификацияси бекор қилинишига кўрсатган таъсири сабабли ФИФАнинг Этика қўмитасига шикоят қилиш ниятида.

Бу ҳақда ташкилот раҳбари Лисе Клавенесс маълум қилди.

Босния ва Герцеговинага қарши кечган 1/16 финал ўйинида (2:0) майдондан четлатилган Балогуннинг четлатилиши бир йиллик синов муддати билан вақтинча тўхтатилган эди — якунда АҚШ терма жамоаси ҳужумчиси Бельгияга қарши 1/8 финал баҳсида (1:4) майдонга тушди. Кейинчалик Трамп ушбу жараёнда шахсан иштирок этганини тасдиқлади.

«Қоидаларни бундай тарзда манипуляция қилиш орқали сиз цехдаги бутун ўйинни хавф остига қўядиган қалтис йўлга қадам қўясиз. Ўйиннинг фундаментал қоидалари бузилиши футболчиларни хавотирга солмоқда.

Энг аввало, бундай ҳолат юз бермаслиги керак эди. Ҳозир бу ҳақда очиқ-ошкора гапириш жуда муҳим. Бу қарорга ташқи кучлар таъсир кўрсатганини ва тегишли тартиб-қоидаларга риоя қилинмаганини ҳаммамиз яхши биламиз. ФИФАдаги раҳбаримиз бунинг хато бўлганини тан олиши керак.

Агар сиз давлат раҳбарларига ва давлат сиёсатига бу тарзда мослаша бошласангиз, хулқ-атворингиз ва ташкилотнинг хатти-ҳаракатлари ўзгаради, давлат раҳбарлари аралашиши керак бўлган чегаралар ювилиб кетади. Айнан шу нарса содир бўлди.

Мунозарали қарорлар қабул қилаётганингизда ва шу билан бирга ташқаридан жуда кучли овозни эшитаётганингизда, қарор қабул қилувчи овозлар кўпроқ бўлиши жуда муҳим. Аксинча, хатога йўл қўясиз.

Вазият жуда жиддий ва жиддий хавотир уйғотмоқда. Ушбу ҳолат одамларга янада очиқроқ бўлишга ва масалаларни кўтариб чиқишдан қўрқмасликка ёрдам беради деб умид қиламан. Мен буни бошқарув йиғилиши кун тартибига киритаман, биз буни муҳокама қиламиз ва чора кўрамиз. Назаримда, этика масалалари бўйича шикоят киритиш зарур. Ҳозир ишни ёпди-ёпди қилишга уриниш фойдасиз. Бу жуда кўпчиликка — футболчиларга, мухлисларга, мураббийларга таъсир қилди», — деди Клавенесс.