«Наполи» ҳужумчиси Ромелу Лукаку 2026/27 йилги мавсумни захира ўйинчиси мақомида бошлаш ниятида эмас. Бу ҳақда унинг агенти Федерико Пасторелло маълум қилди.

«Очиғи, йўқ. У ҳамма нарсани исботлаб бўлган ажойиб футболчи. Лукаку — дунёдаги энг сермаҳсул ҳужумчилардан бири, шу сабабли бундай вазиятни қабул қилишимиз қийин», — деди бельгиялик футболчининг вакили Sky Sport Italiaга берган интервьюсида.

«Ромелу ўзига қизиқиш бўлмаган жойда қоладиган инсон эмас. Клубнинг қарори мутлақо қонуний бўлиши мумкин, аммо футболчининг позициясини ҳам ҳисобга олиш керак», — дея қўшимча қилди агент.

Лукаку жиддий мушак жароҳати сабабли ўтган мавсумни деярли тўлиқ ўтказиб юборди. Клуб миқёсида у майдонда бор-йўғи 64 дақиқа ҳаракат қилди, бироқ Жаҳон чемпионатига қадар тикланишга ва Бельгия терма жамоаси сафида ўйнашга муваффақ бўлди.

Аввалроқ «Наполи» спорт директори Жованни Манна клуб форвард таътилдан қайтганидан сўнг у билан кейинги режаларни муҳокама қилишини айтган эди. Лукакунинг амалдаги шартномаси 2027 йилнинг ёзигача мўлжалланган.