«Кристал Пэлас» клуби «Коринтианс» ярим ҳимоячиси Андрени ўз сафига қўшиб олиш учун «Ювентус» билан курашга киришди. Премьер-лига скаутлари бразилиялик ёш иқтидорнинг клубидаги охирги ўйинини бевосита майдондан кузатишди.
ESPN Brazil нашрининг хабар беришича, «Кристал Пэлас» вакиллари пайшанба куни «Нео Кимика Арена»да бўлиб, «Коринтианс»нинг «Ремо» устидан 3:0 ҳисобида эришган ғалабасида 20 ёшли футболчининг ҳаракатларини кузатиб боришган.
Андре Юри Альберто томонидан киритилган биринчи голга ассистентлик қилиб, ажойиб таассурот қолдирди ва клубнинг энг иқтидорли ёш футболчиларидан бири эканини яна бир бор исботлади.
Қизиқиш ортиб бораётганига қарамай, «Коринтианс» ҳозирча ярим ҳимоячи бўйича расмий таклиф олгани йўқ.
«Ювентус» Андрега даъвогарлик қилаётган асосий клублардан бири бўлиб турибди. Хабарларга кўра, туринликлар футболчининг трансфер ҳуқуқларининг 80 фоизи учун 18 миллион евро ва яна 4 миллион евро бонус кўринишидаги таклифни кўриб чиқишмоқда.
Эҳтимолий битимнинг тузилиши футболчининг трансфер ҳуқуқлари тақсимоти сабабли мураккаблашиши кутилмоқда.
Ҳозирда Андре ўз трансфер ҳуқуқларининг 30 фоизига эгалик қилади, қолган 70 фоизи эса «Коринтианс»га тегишли. Тарқалган хабарларга кўра, таклиф қилинаётган келишувга биноан ярим ҳимоячи ўз улушининг 10 фоизини клубга ўтказиб, ўзида 20 фоизини сақлаб қолади.
Бразилия клуби шу йилнинг бошида Андрени «Милан»га сотишга жуда яқин келган эди, бироқ клуб президенти Осмар Стабиле сўнгги паллада трансферни тўхтатиб қолган.
Андренинг «Коринтианс» билан амалдаги шартномаси 2029 йилнинг декабригача мўлжалланган.
