Тожикистонда бўлиб ўтган CAFA U-20 Women’s Championship 2026 мусобақасида Виктория Сирота бошчилигидаги Ўзбекистон U-20 аёллар терма жамоаси чемпионликни қўлга киритиб, юртимизга қайтиб келди.

Турнир давомида терма жамоамиз Қирғиз Республикаси U-20 терма жамоасини 1:0, мезбон Тожикистон U-20 терма жамоасини эса 7:0 ҳисобида мағлуб этди. Эрон U-20 терма жамоасига қарши баҳс 1:1 ҳисобидаги дуранг билан якунланди.

Мусобақа якунларига кўра, Ўзбекистон U-20 аёллар терма жамоаси «Fair Play» соврини билан тақдирланди. Шунингдек, Шаҳноза Деканбоева турнирнинг энг яхши футболчиси, Шаҳзода Алихонова эса мусобақанинг энг яхши тўпурари деб топилди.

Шу тариқа Ўзбекистон U-20 аёллар терма жамоаси 3 учрашувда 7 очко жамғариб, CAFA U-20 Women’s Championship 2026 мусобақаси ғолиби деган шарафли номга сазовор бўлди.

Бугун Ўзбекистон футбол ассоциацияси раҳбарияти чемпион жамоани кўтаринки кайфиятда кутиб олди.