«Арсенал» мадриднинг «Реал» клуби ҳужумчиси Винисиус Жуниорни ўз сафига қўшиб олган тақдирда, уни жамоадаги энг юқори маош олувчи футболчига айлантиришига тўғри келади. Бу ҳақда The Times нашри хабар бермоқда.

Манбанинг маълумотига кўра, Лондон клуби бразилиялик вингернинг «қаймоқранглилар» билан шартномани узайтириш борасидаги келишмовчиликлари фонида ҳақиқатан ҳам уни сотиб олиш вариантини кўриб чиқмоқда.

Таъкидланишича, айни дамда «Арсенал»да энг кўп маош олувчи футболчи ҳужумчи Букайо Сака ҳисобланади. Унинг маоши солиқлар ушлангунига қадар йилига тахминан 15,6 млн фунтни (18,2 млн евро) ташкил этади. Винисиуснинг «Реал»даги маоши эса солиқлар тўланганидан сўнг тахминан 14,9 млн еврога тенг. «Қироллик клуби» футболчига 20 млн евродан ортиқ маош таклиф қилмоқда, бироқ унинг ўзи 30 млн евро атрофида маблағ олмоқчи.