Юлдуз ҳужумчи Неймар мураббийлар штабининг рухсатисиз «Сантос»нинг сўнгги машғулотини ўтказиб юборди. Бу ҳақда OGlobo нашри хабар бермоқда.
Журналистларнинг маълумотига кўра, бу ҳодиса форвард ва унинг жамоадошлари ўртасидаги жанжалдан сўнг юз берган. Яқинда «Шапекоэнсе»га қарши кечган ўйиннинг танаффусида Неймар жамоанинг ёш футболчилари Жоау Аниасиас ва Габриэль Бонтемпо шаънига ҳақоратли сўзлар айтган.
Ўйиндан кейинги куни 34 ёшли ҳужумчи клуб базасига ташриф буюрган, аммо машғулотга чиқмаган. У расмга тушган, кофе ичган ва қайтиб кетган.
Бразилия чемпионатининг жорий мавсумида Неймар тўққизта ўйинда майдонга тушиб, олтита гол урди ва иккита голли узатмага муаллифлик қилди.
